معوقات التعلم الفعال وكيفية التغلب عليها واحنا بنتعلم حاجة جديدة للأسف الطريق مبيكونش كدا ! هو في الحقيقة بيكون كدا :D طريق التعلم مش ممهد ولا مفروش بالورود لكن محتاج مجهود و اجتهاد موضوع حلقة انهارده عن المشاكل اللي بتقف في طريقك و ازاي تقدر تتغلب عليها و المشاكل دي نقدر نقسمها لمشاكل قبل التعلم ، وأثناء فترة التعلم أكبر مشكلتين من وجهة نظري بقابلوا أي دارس لعلم جديد هم : مواجهة المجهول و التوهان .. - مرحلة مواجهة المجهول، في الوقت دا بيكون لسه داخل على حاجة جديدة ميعرفهاش (زي الطفل اللي بيشوف حد غريب غير أهله لأول مرة) وعشان تقدر تتغلب على دا فانت محتاج تاخد الأمور ببساطة وتحط قدامه المقولة دي: : " الذي يعوق معظم الناس عن تسجيل إنجازات جيدة ليس العقبات الكبرى التي يواجهونها في طريقهم، وإنما التردد والخوف من الانطلاق." عبدالكريم بكار شجع نفسك وابدأ ، لو فضلت طول عمرك واقف على الشط عمرك ما هتتعلم السباحة. وقد قال رسولنا الكريم صلى الله عليه وسلم: من سلك طريقا يلتمس فيه علما سهل الله له به طريقا إلى الجنة - مرحلة التوهان، المرحلة اللي بيكون فيها مش عارف هيتعلم ازاي؟ طب ايه المصادر والمراجع اللي ممكن يستخدمها؟ طب محتاج ياخد كورسات ايه وفين وامتى؟ كل دي حاجات بتيجي في ذهنك و ممكن توقفك عن الاستمرار .. بصراحه و مع التقدم الكبير اللي بنعيشه حاليا فانت ملكش حجة لأنك تقدر تدرس أي علم و تلاقي اي كتاب في اي وقت .. الانترنت و جوجل مخلوش نفسنا في حاجة الحقيقة .. و اكبر دليل انت دلوقتي و انت قاعد بتتفرج عليا .. كده مشاكل ما قبل قرار التعلم الحمدلله قضينا عليها .. نيجي بئا لأثناء التعلم .. بص يا سيدي .. لازم تعرف أن أي حاجة في الدنيا محتاجة مجاهدة للنفس ، وللأسف كتير مننا بعد فترة من بداية دراسته لأي حاجة بيكون عنده نوع من التراخي و الكسل و يبدأ في التسويف و دي هي المشاكل الرئيسية اللي بتقابلنا كلنا في أثناء التعلم بتلاقي نفسك تقول (هعمل كذا بكره) اول ما تقول الكلمتين دول اعرف انك دخلت في زوبعة التسويف ، و أساس المشكلة دي ان معندكش دافع قوي تستمر .. اللي بيعوز حاجة بيعملها و بيوصلها ، الفكرة كلها في حاجة واحدة (هل أنت عايز الحاجة دي بكل جوارحك و حواسك و تفكيرك فعلا ولا لا !) .. و عشان تعدي العقبة دي .. حفز نفسك دايما .. اقرأ في سير العلماء و العظماء و علق حتي صورهم في اوضتك .. انا شخصيا صورة دكتور زويل مخرجتش برا اوضتي من 2010 .. اكتب هدفك من التعليم ايه .. اعمل لنفسك مكافأة انك كل اما تخلص جزء او كورس معين هتعمل حاجة بتحبها .. هتخرج هتشوف فيلم .. هتلعب كورة .. اي حاجة .. ___________________________________________________ فيه تجربة اتعملت على مجموعة من الاطفال وهي إن المعلم بتاعهم سألهم: تاخدوا باكو شيكولاتة دلوقتي ولا تستنوا اسبوع وتاخدوا علبة كاملة ، كل الأطفال اختاروا الباكو دلوقتي قالهم طب تاخد باكو شيكولاتة كمان سنة ولا تاخدوا علبة كاملة كمان سنة وأسبوع ، الأطفال اختارت العلبة اللي كمان سنة وأسبوع في الحقيقة الاتنين زي بعض بس الفرق هنا نظرة المخ للموضوع ، فالمخ دايما بيفضل الفرحة الوقتية ، الحاجة اللي هتحصل دلوقتي مش لما لسه هيستنى ، ودا السبب اللي بيخليك تسيب المذاكرة وتقوم تلعب أو تفتح فيس بوك أو أي حاجة غير المذاكرة ، مع إن فرحتك بمجموعك العالي أو بالمكانة اللي هتوصلها لما تتعلم هتبقى فرحة أكبر بكتير من مجرد لعب ، عشان كدا لازم تحفز مخك دايما وتحاول تخلي من تعلمك حاجة ممتعة وفعالة وتستخدم أساليب مختلفة زي اللي اتكلمنا عنها في فيديو أساليب التعلم ،عشان مخك يتعامل معاها على إنها حاجة ممتعة مش مجرد كلمتين بيرصهم وحاجة بيستتقل يعملها.

:Die Zusammenfassung bearbeitet von Muhammad Ali Khalaf