كنت دايما متفوقة بين زمايلي اني بحفظ الصور والخرايط والرسومات بسهولة جدا .. وكنت بغير من صاحبتي اللي كانت بتحفظ شرح المدرس في المدرسة بسهولة وسرعة وانا كنت مابفتكرش من اللي سمعته كتير لكن الحقيقة لا انا كنت أشطر من زميلتي ولا زميلتي كانت أشطر مني احنا كنا نوعين مختلفين من المتعلمين .. أيوة .. المتعلمين ليهم أنواع مختلفة .. وانت لو ماعرفتش انت أي نوع منهم يمكن ماتعرفش موهبتك في ايه .. وتفضل تتعب نفسك في التعلّم بطريقة مهياش أبدا الطريقة المناسبة ليك 1- المتعلم البصري : انا يعني  وده المتعلم اللي بيستوعب ويحفظ ويفهم بشكل أفضل عن طريق الشروحات البصرية .. ولو انت متعلم بصري حاول دايما تستخدم الرسومات البيانية ، والتوضيحية ، هتفيدك جدا الفيديوهات والمجسمات التعليمية .. استخدم كمان الأقلام والأوراق الملونة .. ده هيزيد من فعالية عملية تعلّمك 2- المتعلم السمعي : اللي بيستوعب عن طريق السمع للأصوات والشروحات الصوتية المميزة .. ولو انت متعلم سمعي تتعلّم باستخدام صوتك .. عيد على نفسك المعلومات بصوت واضح وعالي .. ولو بتذاكر ضمن مجموعة هيكون مفيد ليك جدا تسألوا وتجاوبو بعض بالتبادل 3- المتعلم بالقراءة والكتابة اللي بيتعلم بالتفاعل مع النصوص سواء بإنه يقرأ او يكتب ..وده مفيد له دايما انه يتعرض لامتحانات تحريرية صغيرة يقرأ فيها نص السؤال ويجاوب كتابة .. ده هيضمن فعالية أكبر لعملية التعلم 4- المتعلم بالحركة ولو انت متعلم بالحركة .. فانت اكيد بتتعلم اللي بتعمله بنفسك .. وافضل طريقة ليك هو التعلم بالتجارب العملية اللي تعملها بإيديك .. أو تشارك في أداء مشاهد تمثيلية وحركية تعليمية

:ملخص للدرس من اعداد Eman El Emam