ده الفيديو ... من دورة تعلم كيف تتعلم .. لو كنت اتفرجت على الحلقات اللي فاتت ودونت وكتبت منها بعض ملاحظات .. تبقا فعلا متعلّم شاطر .. بتستخدم أداة وأسلوب فعال من أساليب التعلم لكن بقا لو ماكنتش بتدون ملاحظاتك .. تعالى نتعرف ليه مهم تتعلم تدوين الملاحظات تدوين الملاحظات يعني انك تسجل بنفسك وبأسلوبك المعلومات اللي بتتلقاها من اي مصدر زي كتاب أو مرجع كبير .. زي شرح الاستاذ في الفصل أو في المحاضرة ، زي شرح متحدث في مؤتمر أو اجتماع ، وزي الشرح اللي انت بتسمعه في الفيديو ده ممكن كمان تدون ملاحظاتك عن أفكارك الخاصة .. علشان تعرضها كلها قدامك وتبدأ تفكر فيها كلها في شكل عصف ذهني ليه بقا عملية تدوين الملاحظات تعتبر أداة تعلّم ؟ لأن تدوين الملاحظات بيحتاج انك تستقبل المعلومات وتفهمها ، و تصفيها علشان تستخلص منها المهم بس، وتبدأ تدونه بأسلوبك الشخصي وبطريقة تحافظلك عليها لحد ما ترجع تحتاجها في وقت تاني .. العملية العقلية المعقدة دي بتضمنلك زرع المعلومة في مخك وذاكرتك بشكل مبدأي لحد ما تقرر استرجاعها ويا سلام بقا لو كنت بتدون ملاحظاتك من مصدر بيتكلم .. أصلا احنا انقدر نتلكم كلمتين في الثانية ، لكن بنقدر نكتب كلمتين في 10 ثواني .. شايف الفرق يعني تقدر تعتبر عملية تدوين الملاحظات عملية سباق مع الوقت ، ولو اتعلمت ازاي تدون ملاحظات بالطريقة الأمثل هتكون مش بس اتعلمت أداة جديدة وفعالة للتعلم ، انت هتكون اتعلمت ازاي تحقق أقصى استفادة من وقتك وحسب الدراسات .. تدوين الملاحظات ممكن يزود من فعالية عملية التعلم بنسبة 20 -40% المصدر http://www.idemployee.id.tue.nl/g.w.m.rauterberg/amme/makany-et-al-2008.pdf إيه هي طرق تدوين الملاحظات ؟ انت دلوقتي معاك ورقة وقلم .. يلا نتعلم ازاي ها ندوّن ملاحظاتنا .. كأننا ها ندون ملاحظاتنا عن اللي اتعلمناه في الفيديو ده : أول طريقة من طرق تدوين المعلومات هي : الطريقة الخطية يعني تدون ملاحظاتك في شكل خط مستقيم هتكتب عنوان كبير - تدوين الملاحظات o تسجيل المعلومات بأسلوب شخصي - أهميتها o عملية عقلية معقدة o سباق مع الوقت - طرقها o الخطي o الغير خطي ثانيًا : الطريقة الغير خطية ودي ليها أنواع كتير منها مثلا 1- الخرائط الذهنية : ودي هنتكلم عنها في الفيديو اللي جاي من الدورة 2- خرائط المفاهيم : ودي بتكون شبكة من الصناديق او الدوائر المربوطة ببعضها بمفهوم معين مثلا لو اتكلمنا على عملية التعلّم ممكن ندرس دوافعها – معوقاتها - أدواتها 3- مخطط إيشيكاوا .. إيشيكاوا ده اسم العالم اللي ابتكره .. وده بنستخدمه غالبا لما يكون عندنا مشكلة وعايزين نتعرف على كل أسبابها .. ولو تخيلنا المخطط على شكل عمود فقري لسمكة .. فكل شوكة من السمكة هتمثل سبب رئيسي، وممكن تخرج منها شوكات أصغر تمثل الأسباب الثانوية ودي طريقة تفيدك لو بتتعلّم عن مشكلة معينة وبتحاول تتعرف على أسبابها او توجد لها حلول 4- الشبكات الدلالية .. ودي شبه لعبة الرابط العجيب اللي كنا بنلعبها واحنا صغيرين .. مثلا .. ممكن نعمل شبكة دلالية عن علاقة دورة تعلم كيف تتعلّم بالسبانخ !  دورة تعلم كيف تتعلم ليها علاقة بـ الطلاب – المتسابقين – ريكسونا المتسابقين .. بيستخدموا الكمبويتر في البحث عن معلوماتهم - بيعلموا فيديوهات تعليمية – مدرسين الفيديوهات التعليمية ممكن تكسبهم .. فلوس – شرف المحاولة فلوس .. الفلوس دي بتفكرنا بالبنك .. وممكن نشتري بيها حاجات .. ومنها عملة الدولار الدولارات هي عملة أمريكا .. ولونها أخضر أخضر ده لون السبانخ  ودي طريقة هتساعدك في ربط كتير من المعلومات اللي بتقابلها خلال عملية تعلّمك 5- طريقة كورنيل لتدوين الملاحظات .. ودي طريقة ثبت في دراسات عديدة انها اكتر فعالية في تدوين الملاحظات فيها بنقسم الصفحة الخاصة بالتدوين .. تلت وتلتين .. بنكتب في التلت العناوين الرئيسية ، والتلتين بنكتب فيه جمل مختصرة ومفيدة .. ممكن كمان نسيب في آخر الصفحة مساحة صغيرة نلخص فيها كل اللي كتبناه وبسهولة جدا بعد ما تتم عملية تدوين الملاحظات واكتساب المعلومات .. تقدر تطوي الصفحة بحيث انك تشوف بس العناوين في التلت الصغير من الورقة .. وتحاول تسترجع بنفسك المعلومات المكتوبة في التلتين التانيين .. علشان تتأكد من استيعابك وحفظك للمعلومات بعد ما تتعرف اكتر على الخرائط الذهنية كأداة للتعلم في الفيديو الجاي .. عرفنا إيه أكتر أداة انت بتستخدمها وبتفيدك 

:ملخص للدرس من اعداد Eman El Emam