أنواع المتعلمين لما كنت في المدرسة أو الجامعة كنت بتلاقي نفسك قدام ورق كتيييير مطلوب منك تحفظه قبل الامتحان ، كنت بتحاول تعمل أي حاجة عشان نجمع أكبر عدد من الدرجات. وكان صحابك بيعملوا نفس الكلام. لكن كل واحد منكم كان بيعمله علي طريقته ، فيه اللي كان يعمل خرائط ذهنية و فيه اللي كان يعمل ملخصات للمادة أو اللي كان بيسمع تسجيل المحاضرة و يرجع يشرحها لنفسه و فيه اللي كان بيكرر الكلام بصوت مسموع لحد ما يحفظه و غيرها من الطرق. وكنا ساعات نتخانق مع صحابنا على ايه هي أحسن طريقة و كل واحد شايف طريقته صح. لكن الموضوع ملوش علاقة بأي طريقة هي الصح لأن الحقيقة كلنا كنا صح ، لأن كل واحد اختار الطريقة اللي تناسبه و الطريقة اللي تناسبك مش شرط تناسبني و العكس صحيح. العلماء قسموا المتعلمين لـ 4 أنواع :شخصية بصرية ، سمعية ، قرائية وكتابية ، وأخيرا حركية كل نوع في دول بيستجيب أحسن لطريقة تعلم معينة فمثلا المتعلم البصري بيفضل إنه يشوف المعلومات بعنيه أكتر من مرة و يوضح العلاقات بين كل فكرة والتانية ودا بيخليه يميل أكتر ناحية الصور و الرسومات .. أما المتعلم السمعي بيفتكر المعلومات أكتر كل ما يقولها بصوت مسموع كتير أو حتى يسمعها من حد أكتر من مرة، بيعتمد على حاسة السمع بالدرجة الأولى و هو بيتعلم .. بالنسبة للمتعلم اللي بيميل للقراءة والكتابة ودا اللي بيذاكر بالورقة و القلم .. بيحب يتفاعل مع الكلام يعني مثلا بيحب يكتب ملخصات و خرايط ذهنية و يحول المعلومات لرسومات و يحل اسئلة ... المعلومات بتثبت في دماغه لما يمسك الورقة و القلم من الاخر. لكن المتعلم الحركي بيفتكر أي حاجة ليها علاقة بالأنشطة بمعنى إنه لما يطبق اللي بيتعلمه بشكل عملي بيقدر يستوعبه جدا بشكل كويس و تثبت في عقله.... و ده بيحتاج أمثلة كتير للي بيتعلمه من حياتنا العملية ... علي فكرة مفيش شخص اسمه سمعي بس ولا بصري بس .. كل الناس عندها ال4 مهارات في تحصيل العلم لكن بتختلف قوتهم و ضعفهم من شخص للتاني و اللي مطلوب منك انك تعرف نقاط قوتك و ضعفك .. اعرف مهارتك و تعلم كيف تتعلم ;)

:ملخص للدرس من اعداد Muhammad Ali Khalaf